მესტიის 3D მოდელირება

„ახალგაზრდული თვითმმართველობა“ ახორციელებს ინოვაციურ პროექტს: ვქმნით მესტიის დეტალურ 3D მოდელს ფოტოგრამეტრიის უახლესი მეთოდების გამოყენებით!

ფოტოგრამეტრია გულისხმობს ობიექტისთვის მრავალი ფოტოს გადაღებას სხვადასხვა კუთხიდან და მათ გამოყენებას სამგანზომილებიანი მოდელების შესაქმნელად. იგი სურათებით აწყობილ პაზლს წააგავს, რომლითაც იქმნება ობიექტების ან თუნდაც მთელი დასახლების რეპლიკა!

მოდელის გამოყენება შესაძლებელი იქნება მრავალმხრივი დანიშნულებით, როგორიცაა ურბანული დაგეგმვა და განვითარება, ტურიზმის ხელშეწყობა, ვიდეო-თამაშების შექმნა, ვირტუალური და გაძლიერებული რეალობის გამოცდილებები და სხვა.

ჩვენი მოდელირების ფარგლებში სულ ბოლოს გავაკეთეთ ლაღამში არსებული კოშკის შესანიშნავი 3D მოდელი. ამისთვის გამოვიყენეთ ადგილზე ხელით და დრონებით გადაღებული ფოტოები.

ეს პროექტი, სხვებთან ერთად შთამაგონებელია შესანიშნავი თანამშრომლობის გამო: დაგვეთანხმებით, უმნიშვნელოვანესია ცოდნისა და გამოცდილების გაზიარება. ამისთვის, ჩვენ მოვიწვიეთ უნიჭიერესი პროგრამისტი, ანდრეი არანოვიჩი, რომელიც ჩვენი კლუბის წევრებს უზიარებს ინფორმაციასა და ექსპერტიზას. ვფიქრობთ, ეს გაცვლა ამ პროექტის უმნიშვნელოვანესი მომენტია, რადგან იგი ეხმარება ჩვენს ახალგაზრდა ტექნოლოგიების მოყვარულებს ისწავლონ მეტი, გადაიაზრონ საკუთარი ინტერესები და სწორად განსაზღვრონ კარიერული მისწრაფებები ტექნოლოგიების სფეროში.

პროექტის ფარგლებში ძალიან საინტერესო გეგმები გვაქვს მომავალში, რომელზეც შემდგომში გაგიზირებთ ინფორმაციას. ახლა კი იხილეთ ლაღამის ბარლიანების კოშკის 3D მოდელი: https://skfb.ly/oNVXY 

მესტიის ტექნოლოგიურ კლუბში გაწევრიანების მსურველებმა გაიარეთ რეგისტრაცია: https://forms.gle/hRfgziEvxA15Desz9 aნ მოგვწერეთ: tech@mestiayouth.org 

ფოტოები 📷: ანდრეი არანოვიჩი, მარგო მასლენნიკოვა